Intazaar

Sunna hai kal wo din phir charay ga
Ummedon say dil phir bharay ga
Mangu ya na mangu, yeh sochta hoon
Na milla jo manga, na mangu yeh sochta hoon
Phir jab daikhta hoon mai tairi rehmat ki aur
Tau sochon jaisay thami ho tu nay mairi daur
Yeh hi soch kar tujh say yeh hoon mangta
Ab tau kar day karam, tujh say shukar hoon mangta
Hanstay hain sab log, jau mujhay daikhtay hain
Daikh mairi baybassi, mairay kissay chairtay hain
Yeh na soch, kay mazaq maira bana rahay hain
Haqeeqat may tujh say taaluq pay ungli utha rahay hain
Tu bata day khuda, nahi tu rutha hua
Tairi rehmat ka daria nahi sukha hua
Mai tau hoon faqt tairy hukam ka muntazir
Na milla shukar, tau kar loon ka sabr
Mana log maira phir bhi mazaq urain gay
Mairay peechay say so bataain banain gay
Laikin tu na samajhna taira banday nay tujh ko bhula dia
Mai tau samjhoon ga tu nay ik karam aur farma dia
See loon ga hont, dil ko samjha doon ga
Yeh hi soch kay, ik din aur bita doon ga
Magar suna hai tu tau bayniaz hai
Sari duniya ka ik tu hi sardar hai
Poochu jau tujh say tau maula na bura manana
Bhar do jholi so kar sakon jag ka samna
Na takhtay shahi na aish o ishrat mangta
Tairay samandar say faqat ik qatra hoon mangta

Faryadi

Na rolna mujh ko, Kay rul gaya hoon
Haqeeqaton, Shubahaton mai ulajh gaya hoon
Jo socha tha, woh ho na saka
Jo chaha tha, woh paa na saka
Janay kyun ik tarap hai dil mai
Jaisay khud mai ulajh sa gaya hoon
Nahi, nahi, koi doosra nahi tha
Taira daman mai nay chora nahi tha
Jo poochay mujh say, maira aik hi uzar hai
Banda hoon faqt, mehdood mairi nazar hai
Mai daikhta hoon woh hi, jau too dikhata hai
Har kashti ko tu hi paar lagata hai 
Janay kis manjhdhar mai kho gaya hoon
Aisa lagta hai mai abdi neend so gaya hoon
Nikla tairi talash mai tha, par kia mai dhoond raha hoon
Jaisay apnay hi kaflay ko, khud loot raha hoon
Suna hai Tairi KUN say faislay jahanon kay hotay hain
Soockhay sehray bhi pal bhar mai sairab hotay hain 
Mai bhi sehra hoon, jisay us KUN ki talaash hai
Faqt ik tairay Isharay ka sawal hai
Tu na daikhay ga tau akhir kahan jaon ga
Issi umeed pay ghammon say ulajh jaon ga
Yeh bhi tairay hain, tu nay hi bhaijhay hain
Ik sabar hai, phir ussi ko azmaon ga
Par phir bhi akhri darkhuast hai mairi
Jo lagi ho koi buri baat mairi
Tau samajh laina kay ik gunahgar tha
Jissay apnay khuda pay bara naaz tha
Laikin usay ab bhi sirf tu hi qabool hai
Jo kia us nay bura, yeh us ki bhool hai
Kia karoon Ik khuda ko man chukka hoon
Ussi kay aagay sab hatyar daal chukka hoon
Jo ho tu khafa, tau kahan jaoon ga
Mai wo musafir hoon, jau palat k tairay hi paas aaon ga
Mana hain hazaron rastay, par manzil tau aik hai
Jau hoon tujh say door, par tu tau kareeb hai
Nahi kehta kay mujhay tu qainaat dai day
Ik mard e momin ki mujh ko safaat dai day

Ihsas e Gunnah

Gunahgar hoon, Khata kar hoon

Mana kay samajh kar bhi anjaan hoon

Tu nay jo hai kaha, mai nay woh na suna

Tu mujhay rokta raha, aur mai karta gaya

Gunnahon ki rahon mai chalta gaya

Na socha kabhi hoon faraib may mai

Hoon ghira hua aik asaib may mai

Roz sochta tha, na karon ga phir woh gunnah

Par daikh gunnah ko, main na kabhi ruk saka

Woh tha shaitan, yah tha maira nakis iman

Mai nay khud  hai boya, jhannum ka saman

Janay kaisay khara ho jata hoon musalay par

Kay hoon gira hua parlay darjay par

Laikin sab hotay huay bhi ik ihsas hai

Maira rab har lamhay mairay paas hai

Ya rab hai sach kay gunnahgar hoon

Mana kay janta hoon, par lachaar hoon

Mat kar door mujhay khud say is tarhan

Kay sawan ko tarsoon mai barsaat may

Tairi KUN say agar hotay hain sab faislay

Kia jata hai jau kar day jau TU maaf mujhay

Zar, zameen, ran naheen mangta

Mai tau tujh say hoon apna rab mangta

Loota day woh banda jo kabhi tairay sath tha

Jis kay paas har lamhay taira ihsas tha

Jau chalta tha tujh ko tha tujhay sochta

Jis ko nazar aata that tu hi har jaga

Banda tau hai woh hi, par gunnah gar hai

Har lamha tairi rehmat ka talabgar hai

Taira gazab hai mujh pay yoon chaya hua

Jaisay mujh mai hai firon samaya hua

Nahin mai nai hoon woh jhoota khuda

Mai nay tau hai bus tairi bandagi ka hai dawa kia

Gar taira banda honay ki hai yeh hi saza

Tau mat cheenana muh say honsala maira

Woh ihsas, wo tarap jau mujh mai hai chuppi

Na laina mairay rab mujh say mairi bandagi

Ankhain hain nam, dil bhi ashkbar hai

Janay kyun tujh say doori ka ihsas hai

Ab tau aa ja, kay dil ko mai nay hai dho dia

In ansoon say is dil ko hain mai nay ghusal dia

Napak hon, kameen hon, aur gunahgar hoon

Taira asoolon ko torh kay, khud say naraaz hoon

Par mat moro apni rehmat kay talabgar hoon

Hoon banda hi taira gar sazawar hoon

Nahi chaiay hai mujh ko zameen o sama

Jab mujh say ho rotha maira rab e do jahan

Mat choro mujhay kay kidhar jaon ga

Aj khud say hi lar kar bhikar jaon ga

Roothay ho, tau mananay ka dhang bhi sikhla do

Is dunniay kay thukrai ko seenay say laga lo

Nahin kehta kay mairi chah ka hai nahin muqabla

Na yeh kahoon kay nahin taira ashiq koi mujh sa yahan

Laikin gar jhankay mairay dil mai tu zara

Is dil ki bunyadon mai hai tairay hi naam likha

So logo ko mai day doon is dil may agar jaga

Tairi bunyadon ko nahin kar saktay hain wo khokhla

Mat cheen mujh say mairay dil mai apni jaga

Wahad is dil pay rehnay day kabza maira

Han sawaro ga, nikharo ga is ki bunyad ko

Rakhoon ga ik din is may tairi yad ko

Is ihsas ko na cheeno ka kidhar jaoon ga

Zinday reh kay bhi warna mai mar jaoon ga